|
|
| ID:
|
100.044 |
| Leto:
|
1325 |
| Mesec:
|
12 |
| Dan:
|
17 |
| Datum:
|
1325 XII. 17. |
| Regest:
|
Ortenburški grof Majnhard (I.) naznanja poravnavo z bratoma Volkerjem (II.) in Herbardom (V.) Turjaškima. |
| Izstavitelj:
|
Ortenburški grof Majnhard (I.) |
| Prejemnik:
|
Volker (II.) Turjaški; Herbard (V.) Turjaški |
| Arhivsko nahajališče:
|
GAFA, predal 1 |
| Edicije:
|
Komatar, Schloßarchiv, str. 141–143, št. 40. — Preinfalk-Bizjak, TKL I/1, str. 96–98, št. 44. |
| Regesti:
|
Wißgrill, Schauplatz I, str. 233–234. — Tangl, Ortenburg, str. 117 |
| Komentar:
|
Listina, ob tej priliki izdana s strani bratov Turjaških, se nahaja v HHStA, AUR, 1325–XII–17; regest v MHDC VIII, str. 239–240, št. 824. |
| Besedilo:
|
Wir graf Meinhart von Ortenburch vergehen offenleich an disem prief vnd tun chunt allen den, die in sehent oder hornt lesen, daz wir vns gnedichleichen bedacht haben vnd durch herrn Greifen von Rewtenberch vnd anderr vnser diener willen mit den prudern herrn Volker vnd herrn Herbort von Owesperch genzleich verricht habn vnd in vnser huld gelazen habn vnd aller sache kegen in ergezzen habn an vmb dev lehen, dev si geichen habent von dem goczshows von Salczpurch vnd von der grafschaft von Sternberch, mugen wir so des beweisen mit gutem vrchunde, daz si ez pilleich von vns emphahn schulln, daz schulln si tun an alle widerred. So haben wir in auch die sechs hundert mark, die wir in anbehabt habn vor vnserm ocheim von Chernden genzleich lazen. Dar vmbe vnd vmb andern vngelimf, den si kegen vns getriben habent, habent si vns gelobt die vorgenanten pruder ir ainer dienstes gewaertik sein zu den nesten zwain jaren in dem lande selb vird vnd auz dem land selb ander, da wir mit vnsers selbes leib hin varn. Wær auer, daz wir selb auz dem land niht furen, so schulln si vns zwen erber diener an ir stat lazen, die so mit dienst wol verwesen mugen vnd habent vns den selben dienst gelobt wider allermenchleich wan wider den lanczsherrn oder wider vnser mumen von Gorcz oder wider den Owuenstayner oder wider ander ir vrewnt, da si von iren twn niht pilleich wider dienten an alle arge list. Waer auer, daz die vorgenanter pruder chain schaden in vnserm dienst nemen, den schulle wir in ablegen vnd schulln si daz habn auf vns vnd auf vnsern erben vnd schulln so des gutleich auzrichten vmb die gult, die wir kegen in vnd si kegen vns vnd vnser diener paidenchalben kegen ain ander ze sprechen habent, vnd vmb des Melczen hofstat, die er ze Owersperch hat, als er giht, die sein en vnd sein vater gehabt habnt, da schol man in auf sein gewer seczen, da schulln ainlef erber mann vber sprechen, die hie pei namen geschriben sint: her Greiff von Rewtenberch, her Rainher Schench von Osterwicz, her Wlreich von Silberberch, her Marchwart von Pilchgrecz, her Nyklav von Rotenpuhel, her Marchwart von Polan, Ott von Sicherstayn, Ott von Hertenberch, Wilhallem von Newnburch, Alber von Hophenpach, Hertel von Pilchgrecz. Auf die ist ez gelazen, die schullen sprechen auf den nesten svntach nach den weinachten, die nu schirst chumftik sint. Vor denselben schulln die vorgenanten Owersperger vnd der Melcz ire recht beczaigen mit hantuesten oder mit anderer erber gewizzen. Swaz die vorgenanten ainlef mann pei iren trewn nach dem rechten darvber sprechent, daz schulln wir paidenthalben stet haben. Wær auer, daz der ainlef chainer abgieng, so habn wir den gewalt vnd her Greiff von Rewtenberch, daz wir ander an ir stat zu dem spruch wellen schulln. Swes si vns oder wir so entwert habent seit der zeit vnd wir mit vnserm seligem oehaim graff Hainrich von Gorcz den tach ze Laybach heten, daz man mit gut gewizzen beczaigen mak, da schol iederman den andern wider auf sein gewer seczen vnd geschehe denn ain recht. Swaz alter sache ist, die wir kegen ainander zesprechn haben, da schulln wir vns paidenthalben so wir schirst mugen ain tach vmb nemen vnd schulln vns da gutleich mit ain ander berichten. Wær auer denn des niht, so verantwort iederman sein erbe, da erz pillich verantworten schol. Swelhen schaden wir oder vnser diener in gtan habent seit der zeit vnd wir den tak ze Laybach heten mit vnserm oeheim von Gorcz, den schulln si auch beczaigen mit guter gewizzen den ainlef mannen vorgenant. Swaz die darvmbe auf den vorgenanten tak sprechent, daz schulln wir auch stet haben. So loben wir in pei vnsern trewn fur alle vnser pruder, daz si der huld auch genzleich habn schulln. Daz dicze stet vnd vnuerprochen beleibe, daruber gebn wir in disen offen prief mit vnserm anhangendem insigel ze gezevg vnd ze ainem vrchunde der warhait. Des sint gezevgen: her Hainrich von Sicherstayn, Fridreich von Mangospurch, Mainzel von Sicherberch, her Wlreich der Geslecht, Jacob vnd Perchtolt von Rewtenberch, Herman von Mangospurch vnd ander erber levt, die da pei sint gewesen. Der prief ist geben ze Laybach in der stat, nach Christes geburd vber drewzehen hundert jar, darnach in dem fumf vnd zwainzigstem jar, des nesten eritags vor sand Thomas tak. |
| Objava listine:
|
TL1-044.pdf |
| Pečati:
|
Majnhard I. Ortenburški |
| Changed at:
|
10.4.2009 13:06 |
Changed by:
|
M. Bizjak |
| Created at:
|
6.4.2009 8:46 |
Created by:
|
M. Bizjak |
|
|